#اخو_راجلي20¥ الاخيرة #

 

  للحظة حسيت بأنو ربنا استجاب لدعواتي وانو الحقيقة حتظر اخيرآ..وانا ماشة مع المدير اللهفة كانت بتسابق خطاي وشعرت براحة م عادية..مشينا المكتب ومدا لي منديل..وقالي خير يابتي مالك..انا فكيت ف البكاء وحكيت ليه الحصل وانو ماف زول مصدقني عشان كدا لجأت ليهم واترجيتو عشان يساعدني..عمكم قام م كرسيهو وقعد ف الكرسي المقاصد حقي ومسك يدي ويهدي فيني وقال انو من مبادئ الشركة وقوانينها انو م يطلعو خصوصيات العميل إلا عن طريق قرار حكومي او قضائي ولو خالفو القوانين حيضرو بسمعة الشركة!! بس قالي م تخافي انا بساعدك..وانا من فرحتي قمت ع حيلي وسلمت علية شديييد من يدو وانا بشكر فيهو..زولكم قام ع حيلو وختا يدينو ف كتافيني ومبلس فيهم وكانو برقد ف شعري..وشغال م تزعلي وانا هنا وحقيف معاك وقرب يضمني عليه طوالي زحيت منو وقعدت ف الكرسي!! مرق كرت من درج مكتبو ومداهو لي قالي دا رقمي اتصلي علي ف اي وقت ولازم نتلاقى عشان اقدر اساعدك وبنفوذي حطلع ليك السجلات صوت وكتابة..ويعمل لي ف حركات..انا اتصدمت ف الراجل القدر ابوي الم عاقل!! ياخي انا قدر حفيدتو..وتاني دموعي نزلت قالي مالك بتبكي انا جمبك وحدعمك وبقى يتحكحك!؟ للحظة قلت اسايرو ف فهمو لحدي م مشكلتي تتحل بس والله م قدرت قرفت منو ومن نفسي وطلعت خليتو بنادي فيني! ياخ انا بكيت بكاء ف الدنيا دي لمن استغرقت..رجعت بيتنا مهمومة وحاسة بانو ربنا بعاقبني ع شيء بس م عرفت شنو..والله ي جماعة انا م بتجاوز حدودي مع زول وحتى المدير انا جيتو ولا دلال ف عيوني م عاملة وعبايتي لمن مكرفسة بس م بعرف الرجال ديل العاجبهم فيني شنو؟! ع دخلتي للبيت تخيلو امي قالت لي مشيتي وين ولا لقيتي ليك راجل جدييد..انا بقيت م بشوف قدامي وما عارفة القاها من منو ولا منو..دخلت غرفتي من هديل شافتني ادت وشها الحيطة! صليت الظهر ورقدته ف مصلايتي وخلاص يئست من الحياة..واسمع التلفون يضرب ويضرب وانا م قادرة اقوم ارد نهرتني هديل قالت لي اقفلي عفنك دا مزعجني! قمت شلتو لقيتها علا..من قلت الو حلقي اتخنق وم قدرت اقول ولا كلمة..م سالتني عن مشيتي لانو فهمت اني م اتوفقت..قالت لي م تزعلي ربنا موجود وكلو لخيييير وعندي ليك حل..انا حثبت برنامج بتاع تسجيل مكالمات ف تلفون عثمان لانو تلفونك ماسورة م بثبت تطبيقات زي دي.. وخليهو يتصل عليك ولا انتي اتصلي عليه والمكالمة حتتسجل بعداك نفضحو قدام الناس..قلت ليها وانا فاقدة الامل اعملي البتشوفيهو مناسب!! وقفلت منها اخدت لي نومة وحتى وانا نايمة بحلم بالموضوع..قمت العصر ورجعت لي قالت انو لقتو قافل تلفونو بباسورد..م اتفاجأة لاني عارفة روحي شوم ومتعكسة علي بس قالت حتقنع عبير تساعدنا لانو عثمان ماخد موقف منها لانها وقفت معاي ولو قالت ليه افتح تلفونك قد يشك فيها..وقفلت..فعﻵ اقنعت عبير وعبير وافقت م عشان خاطري بس ف جواها حاسة انو ف حلقة ناقصة ف القصة دي ولازم تعرفها..قالت لاخوها انها عايزة تنزل منو تطبيق ولا لعبة م عارفة وهنا علا بتتاوق عشان تشوف كلمة المرور شنو وعبير بلهيهو بالكلام وعلا اتهجمت..ابوي جاني المساء قالي بكرة حتمشي تقعدي مع عمتك اخلاص ومدا لي التزكرة قالي اخوك حيوصلك الصباح الميناءالبري!! انا بعاين ليه وم عارفة اقول شنو بقيت زي الدمية محل يوجهوني بمش وخشمي م بفتحو..فعﻵ الصباح وانا ف الباص اتصلت علي علا وشاكلتني قالت لي لشنو قافلة تلفونك من امس وهي من القلق م قدرت تنوم!! سالتها الحاصل شنو قالت لي زغرتي..انا رتسمت ع ملامحي ابتسامة باهتة وم ليها معني..قلت ليها قولي سريع..قالت انو جربت اي كلمة مرور خطرت ف بالها وحتى اسمي جربتو بس كلو بيديها خطأ لحدي م ساعدتها عبير وقدرت تشوفو وهو بيكتب ف الكلمة تخيلو طلعت شنو!!  اسمي زااااتو بس ضايف علية تاء الملكية..وانها بعد خلتو خشا الحمام ثبتت التطبيق وم كدا وبس حتى المكالمات الوراها لناس البيت مني وف انصاص الليلي طلع الرقم م رقمي بس كاتب الاسم اسمي ولم وراهو لناس البيت ماف زول لاحظ للرقم هي طوالي عملت ليه اسكرين شوت بس م قدرت تحولو ف تلفونها لانو عامل كلمة مرور للارسال برضو..ولانها مفتحة ربنا يحفظها صورت السجلات بتلفونها هي من شاشتو..انا لم قالت لي كدا م تتصورو فرحت قدر شنو وف نفس الوقت ببكي لانو لولاها م كنت حقدر ع اخوها..قالت لي بعدا اتصلي علية والمكالمة حتتسجل براها..فعﻵ اتصلت بس م ردا علي..وانا بعاين بشباك البص وبشكر ف علا ع وقفتها معاي الشي الم لقيتو من اهلي وراجلي..بس كان اسمع ليك الاغنية بتاعت ظلموني الاحبة مشغلنها ف الباص بغني فيها مهاب..وانا فكيت ف البكاء لمن برجف المرا الراكبة جمبي تعاين لي ساي ولم شافتني انفعت شديد ومتبشتنة سألتني عن الحصل ابيت اوريها بس اصرت علي وقالت لي اعبريني امك ولا خالتك وسألتني عن زوجي ولشنو انا مسافرة براي وبقت تحقق معاي ولاني محتاجة لزول يواسيني حكيت ليها قصتي المره كبستني وبقت تبكي لمن المسافرين لاحظو لينا..ولحسن حظي واتاري ربنا مسطر لي كل الخير ودبر لي سفرتي دي عشان الاقيها لانو ولدها شغال ف نفسسس الشركة حقت الاتصالات وقالت لي ولدي لو يخسر وظيفتو ولا يتسجن عديل حيساعدك يعني حيساعدك..قالت انها ماشة مناسبة يومين وحترجع الخرطوم اتفقنا نرجع سوا وصلنا وشالت رقمي..وانا مشيت ناس عمتي استقبلوني بس النظرات منها ومن بناتها كانت فيها الف سؤال!! المساء رجع لي عثمان وقالي لم شفت رقمك م صدقت نفسي وبدا يشغل لي اسطوانة الحب ديك..مع انو المرا قالت حتساعدني بس انا لسسسه عايزه اوقع عثمان ف شر افعالو..وقلت ليه طيب لو انا وافقت حتزيح وصمة العار العلي دي كيف المهم جرجرتو ف الكلام كدا وقفلت منو حسيت بيهو شاكي ف كلامي وكيف فجأة كدا غيرت رأي بس مشاني ف الكلام وعايز يشوفني بصل لويين..بعد اليومين تمو ودعت ناس عمتي وطلعت منهم مع انها رفضت بس م قعدت ولقيت المره منتظراني ف الموقف رجعنا الخرطوم وقالت ولدها اتحصل ع التسجيل لقيناه منتظرنا ف الميناء وادنتي ليه وقالت حتجي معاي بيتنا بس ولدها رفض وقاليها حتزورونا ف وقت تاني انا ارتحت راحة ف الدينا دي وحسيت بأنو القدر بدا يبتسم لي!! ع وصلتي البيت من دخلت امي طشش لطشتني كف..جيتي لشنو وقله ادبك وعنادك دا هم المضيعننا نحنا م اتكلمت معاها مشيت لابوي ف الصالون ولقيت معاه اخوي وريهم الحاصل وطلعنا ع بيت ناس نسابتي..دقينا الباب فتح لينا عمر لمت انهجم لم شافنا..دخلنا وقفنا ف الحوش البيت م دخلناهو وابوي انفعل انا الغلطان الافتكرتك راجل واديتك بتي وانا الضيعتها م انت..وعمر يقول فهموني الحاصل شنو!! ناس البيت جو متلمين وعلا تعاين لي وتتبسم..ع طلعة عثمان اخوي طقشو بونية لمن ضرب الحيطة إلا مسكوة منو مسك وامو تسكلب انا قلت ليهم انا م عايزه منكم شيء بس جيت ابري نفسئ..اخوي سمعهم التسجيل حق الشركة وعلا جرت جابت تلفون عثمان اول حاجة ورتهن انو كلمة المرور اسمي انا!! وم خلت ليهم شي التسجيل والرقم الوهمي القال حقي وناس البيت اتصدمو وعثمان وشو بقي احمررر زي الطماطمة وبيرجف العواليق..عمر فاتح خشمو وبيبكي وجسمو مات وصوتو راح وبهز ف اخوة وداك مدنقر ف الواطا ..وقال ليه انت ي عثمان انت ي اخوي تغدرني..انا بعتبرك ابوي انا طلقت مرتي وكذبتها عشانك وداك ساكت عمر نطحو فوق ووقع بيهو الارض بيضرب فية والكلب داك يدو م رفعها امو طارت فوق ودقت الواطا صدمت تقريبآ بناتها جرن عليها عمر برك ف الواطا وبيجعر زي النسوان والناس جمهرو وكان اشوف ليك ابو عثمان مرق السكين وعايز يقز ولدو بس عمر مسكو لمن السكين جرحتو ومداها لعثمان قال ليه عليك الله اكتلني لاني م بقدر اعيش بعد عرفت حقيقتك وعملوها لينا مسلسل وانا بعاين لعمر وهو خجلان يخت عينو ف عيني بالجد حسبت بالنصر ابوه كفتو كفيت لدرجة انو ضربوبالمركوب ف وشو والابو وقع طلعو اسعاف ونجدة من البيت ابوه ع المستشفي واخوة ع قسم الشرطة وانا رجعت بيتنا مرفوعة الراس ..وامي  خجلت تواجهني بس برضو بكت لانها م وثقت فيني..صحي ي جماعة الموت م هو مفارقة الحياة بس حتى فقدان الكراامة بعتبر موت!!  بعد يومين والاخبار اتشرت ناس تبارك وناس بتجامل بس صدقوني بقيت م شغالة بيهم كتير..جو ناس عمر واهلو بيتنا واعتذرو مني ومن ناس بيتنا وابوي م اداهم كلمة بس قال ليهم الفيهو الخير ربنا يسويهو!! وانا خشمي م فتحتو جاتني علا ف المطبخ وحضنتها شديييد وشكرتها ع مساعدتها لي..وقالت لي اخدي راحتك بس م تطولي علينا منتظرنك ابتسمت وطلعت جاني عمر بعديها ابيت اعاين لية وجيت طالعة من المطبخ..مسكني وبيبكي وقال هو خجلان يطلب السماح مني لانو م قادر يسامح نفسو وانو م من حقو يطلب رجعتي معاه بس اترجاني وقال لو انا شفت نفسي بقدر اديهو فرصة تانية بكون ممنون لي..م رديت طلعت طوالي..قعدت مع نفسي وقررت اني اواصل تعليمي وانسى عمر وكل الحصل معاي! بس القدر مخبي لي شيء تاني..ابوي جاني وقالي انا م بجبرك ع شيء بس حاولي ارجعي لراجلك لوشايفة نفسك لسه عايزة تستمري معاه ومشى خلاني بصراحة انا مشوشة وم عارفة اعمل شنو عمتي تتصل وعبير وعمر دا خلوة ساي يومي ناطي لينا ف البيت..لو تتزكرو لم كنت عيانة الدكتورة قالت عندي إلتهابات رجعت ليها لانو حبوبي خلصت ودورتي م جات ف مواعيدها..وحصلت المفاجئة اني حامل لسه م تميت شهر..انا اتصدمت م عارفة افرح ولا ازعل اوري زول ولا اضيع الجنين!! راسي كبس بس وريت علا امي م كلمتها والصواطة ورت عمر جاني من محل شغلو الفرحة م سايعاه..وهنا اهلي اتدخلو ورجعوني بيتي عمتي فرحت وعملو لي كرامة وعمو ابرع لينا بسفرة لمصر ولا عمرة..وانا ف بيتي حفت اني اكون استعجلت برجعتي بس كانت الاولوية لطفلي السه م جا..بس ملاحظة انو علاقتي مع عمر بقت باهتة م فيها شغف وحب ورغبة زي اول بقي مكسوف مني وخجلان وشعلة الرغبة الجواي طفت بس بتمني لقدام نرجع زيالاول واحسن..ووعدني انو يوديني فرنسا وحتى بدا يلم ف القروش يمكن لم نكون تحت ضوء برج ايغل والنجوم بتشهد ع وعودنا الابدية قد يرج الشغف والحب يتغلغل جواتنا..وبتمنى ليكم كل السعادة..  #النهاية  #

كسرة  بشكركم ع حسن متابعتكم وبتمنى تنال اعجابكم وربنا يكفيكم شر عبادو وامثال عثمان ؛وحابة اقول ليكم انها قصة من نسج خيالي واي شخصية م معني بيها شخص معين بس للاسف ف منها ف الواقع وم شرط يكون عثمان اخو الراجل بس قد يكون الاب اوالعم  او ودالاهل اوالجار!! فبتمنى ربي يحفظني واياكم منهم..وف الختام استغر الله العظيم لي ولكم... #آلاءآدم _إبراهيم

#اخو_راجلي19¥

  

 م كنت متخيلة انو يحصل معاي كدا ف يوم من الايام بس ربنا اختبرني وكان اختبار صعب علي..وم اي زول بيقدر يستحملو..العروس الماتمت اربعة شهور طالبة الطلاق وبسبب خيانة زوجية!! انتو متخلين معاي بشاعة الموقف..عمر قالي خلاص اتنازلتي عني..عاينت ليه بنظرة احتقار وقلت ليه وانا دموعي سايلة م وقفت..إنت قلت اخوك شريفي وجدو النبي وم بغلط !! معناها انا الغلطانة لم تقيف مع اخوك وتخلي مرتك ف الوقت الهي محتاجة دعمك فيه متفقد كل حقوقك علي..والواطي داك يقول ليه عمر العن الشيطان عمر م تتهور وزولكم واقف متنح وبعاين لي وانا عيني ف عينو حسيت بحاجة جواي فارت وقوت قلبي لدرجة انو دموعي وقفت..وقلت ليه ي عمر انت اخترت اخوك طلقني..امو سكتت وكأنها مؤيدة كلامي بصراحة كلهم سكتو إلا اتنين تتوقعو منو؟! علا وعثمان..علا تبكي وتقول ليه ي عمر مرتك بريئة وبجد انتو ظالمنها..عمي العمرو م اتكلم معاي الليلة طلع ليه صوت وقال ليها انتي شافعة وبتنغشي سريع ف الناس..وودالحرام عثمان يقول ليه انا اصﻵ مسافر وانا والله م بقدر اسامح نفسي لو خربت بيتك بسببي وكلام فاضي كتييير حيفور دمكم ساي..انا خلاص انفعلت وقلت ليه ي عمر اختار انا ولا اخوك..للحظة حسيت انو حيحضني ويواسيني ويخفف حزني! بس طلعت غلطانة ي جماعة قالي #طلقانة ااااي العروس إطلقت..بس صدقوني رغم الالم السببوه لي الجماعة ديل إلا اني حسيت بنفسي اتحررت منهم ومن نظرة الإشمئزاز الكنت بشوفها ف عيونهم..طلعت بيت اهلي وانا م شايلة غير توبي ولا شيء م شلتو معاي..وداني طليقي ونحنا ف الطريق م فتح خشمو معاي وانا م كنت بفكر ف طلاقي ولا كلام كتير كنت خايفة ع امي والصدمة لم تعرف بالحصل..فعﻵ جينا البيت وناس بيتنا من شافونا عرفو ف مشكلة بس اكيد ماف زول متوقع الحصل..خليتو بيحكي مع ابوي واخواني واظنهم نادو امي وانا قاعدة ف غرفتي الزمااان ديك..اظنو امي صدمت وعملت عمايل وانا م جايبة خبر ونادوني..تخيلو معاي لم ابوك يناديك ويسألك إذا كنتي ع علاقة ولا اعجاب بأخو راجلك..واخوانك واقفين وعيونهم بطلع شرار!! تخيلو لم تجي لابوك مطلقة وانتي لسه بتتسمي عروس والسبب خيانة محارم!! انا بمر باسوأ ايام حياتي بس الصبر طيب والله المستعان ع مايصفون..عمر رجع وانا فضلت مع ابوي وحكيت ليه كل الحصل وزعل مني لاني م دخلت زول من بدري ولا م كان حصل الحصل..وقالي إني عملت ليهم فضيحة وم اظن المشكلة دي حتتحل..اما امي نبع الحنان..حطمت الارقام القياسية ف الشتائم والإحباط..وطلعت الحق علي انا من زمان كنت حاسة بأنك بتفضحيني مع الناس حذرتك بطلي الرشاقة بطلي الخفة والهزار وشوفي وصلتي لوين واختك زنبها شنو خربتي عليها..ياجماعة كلام والله بستحي اقولو غلقلوني بطريقة كعبة خلاص والعجب هديل كأني م حذرتها من عثمان وريتها انو عايز ينتقم مني..وشوفو الكلام الفاضي  اتسببتي لي وخربتي علي واقول لصحباتي شنو اختي وخطيبي..وقلت ادبها ياجماعة انا فكرت انتحر لدرجة اني ربطة التوب ف المروحة ولم جريت بيه نفسي وقعت انا والتوب!! الخبر انتشر الجيران يتهامسو وامي واختي ماغصني ياخ انا الشارع م بقدر اطلع من شدة م الناس شالو حالي وطلعوني اي كلام..شفتو حكاية امرأة العزيز تراوض فتاها وقد شغفها حبآ بس سوها تراوض اخ زوجها وم خلو شيء لدرجة انهم قالو قبضوني معاه عدييبل..والفريب والعيد بقيت ع لسانو وحتي ف الملمات بقو يتونسو بي..عمر م اتصل علي غير مره واحدة سألني إذا محتاجة للعفش عشان يرحلوه لي!! تخيلو بس..وقفلت الخط ف وشو بس عثمان الكلب اتصل علي كم مره وم رديت عليه..ف يوم كنت زهجانة وعايزه اتفش ف زول رديت وبديت ليك ف النبز م خليت ليهو شيء..وهو بيسمع انا قايلاه مشى خلا التلفون ولا نزلو من اضانو م رد علي نهائي..بعداك  شلت نفس حار كدا قال لي وينو عمر الابيتبني عشانو وينو حبيبك القال بضحي بحياتو عشانك وين الناس الكنتي بتحترميهم وخايفة ع زعلهم الواقف معاك منو!! انا دموعي جرت وقلت ليه واقف معاي رب العباد واكيد حينصفني..ضحك وقالي انا لسسسه شاريك م تتصوري انا فرحان قدر شنو لانو اتطلقتي من اخوي اصﻵ م كان مناسب ليك وانا بوعدك انسيك كل الحصل بس انتي اديني فرصة..انا بسمع فيه وضحك مزهولة من سزاجتو..طبعآ احترت ف امرو بس قلت ليه انت م طبيعي انت مريض نفسيآ ومش إذا دمرت حياتي وطلقتني من اخوك إذا ختيتني ف حبل مشنقة م حستجيب ليك..ضحك وقالي برضو منتظرك وبحلم باليوم الحتكوني معاي..وقفلت فيه..لقيت كم مكالمة من رقم غريب بس ابيت ارد قلت بكون دا هو خاشي علي برقم تاني..لحدي م لقيت رسالة من نفس الرقم طلعت علا..رجعت ليها وكالعادة عدتو لي بكاء ساي وقالت انو اخوها تعبان وم بياكل وم بخش بيتنا نهائي من انا جيت اهلي.. وانو الاوضاع لسه متوترة وكلام كتيير وحكيت ليها عن اتصال اخوها اتهجمت طبعآ..وقالت لي الواطي حلا لينا مشكلتنا!! اتمشي شركة الاتصال وتطلعي السجل المكالمة بس قلت ليها ف حاجة محيراني كيف نلقى مكالمات مني لاخوك الساعة2صباحآ منو الحيكون اتصل!! هي زاتها احتارت وقفلت منها وفعر مشيت لاخوى ووريتو بحكاية سجل المكالمات بس قال م بيدوني ليهم إلا بإذن من المحكمة ورفض فكرة اني افتح بلاغ قالو م عايزين فضائح ف المحاكم بسببي واشيل الموضوع من راسي كفاية الحصل...انا م اقتنعت وقلت لازم ابرئ نفسي وفعﻵ مشيت للشركة(بدون ذكراسمها) وبتاع الرسبشن ابى يدخلني للمدير قدر م حاولت..قعدة ف الانتظار وكان اشوف ليك صاحب عثمان الزمان داك لو متزكرنو خلاص انا انهجمت وقلت لو عرف حيوري عثمان ولا يسحبو السجلات هم!! تاني رجعت لبتاع الرسبشن وقلت ليه عليك الله ساعدني دي مسألة حياة او موت..طردني الوسخ ونادى لي بتاع الامن! وانا طالعة شافني راجل خمسيني كدا وانا ببكي قال دي مالها انا طوالي جيت جارية علية وطلع دا المدير الكبير وساقني معاه مكتبو!! يتبع..

#اخو_راجلي18¥

 

  انا ف اللحظة ديك م عرفت اقول شنو وكلهم بفترسوني بنظراتهم..اقول شنو وابرئ نفسي كيف متين الرسائل دي طلعت من تلفوني ومين انا بتصل ع عثمان وعمتي م شافتني غير مره واحدة مارقة من الصالون بس م شافتني ف منظر مخل..عمر جايط فيني وبقول لي انا سألتك جاوبيني انتي عملتي كدا وانا م قادرة اتكلم بس بهز ليه براسي يعني لالا..ياجماعة راجلي بكى و يداري ف دموعو قدام امو واخواتو ودفرني  وطلع..انا ف اللحظة ديك م عارفة رجليني ف السماء ولا الارض بعد فتحت لقيت نفسي ف برندتي وعلا جمبي بتبكي.. انا كنت بحس بنفسي اسعد واحدة ف يوم الجمعة لانو اتعرفت عليه راجلي ف نفس اليوم وخطبني برضو يوم جمعة وعقدي كان يوم جمعة يعني بتفائل باليوم دا..بس الليله ح اعلن الجمعة يوم حداد ع شرفي وسمعتي الإتلطخت ..سألت علا  عن عمر قالت كان بتكلم مع ابوه ف الصالون قمت عايزه امشي عليهم مسكتني وقالت لي يستحسن انك م تمشي عليهم لانو متنرفز شديد اصبري حيجي وكلو بيصلح..وقالت عثمان اخوها كلب ومنحط بس وعدتني انها تقيف معاي للاخر وانها كلمت امها انو ولدها ليه فترة خاتي عينو علي..المهم عمر جا! هي طوالي طلعت..قعد ف الكنبة وعيونو زي الدم وبرجف ف رجلينو وقالي القصة واضحة زي عين الشمس بس لازم اديك فرصة تدافعي عن نفسك انا كلامو دا وجعني شديد وفكيت ف البكاء معقولة ي عمر م بتثق فيني معقولة كل البيناتنا كان هش للدرجة دي..دمعتو جرت وقالي احترت اصدق منو فيكم بس الدلائل كلها ضدك عايزه تقنعيني انك م رسلتي الرسائل دي طيب عثمان لقي تلفونك وييين!! المكالمات ياخ مكالمة الساعة 2صباحآ عثمان كيف يحصل ع تلفونك ف وقت زي دا حتى امي قالت لقتك مارقة من الصالون وم كان ف زول غير عثمان وبرضو بتكذبيهم؟! حرام عليك انا قصرت منك ف حاجة..حتى رغباتك م اشبعتها ليك ياخ انا حبيتك ي بت الناس تقومي تخو...وشال نفسو وسكت!! انا ببكي وبقول ليه واصل انا شنو؟! قالي انا عايز اصدقك بس م قادر وكمان عثمان لشنو يتهمك اتهام زي دا وهو الكان بترجاني عشان احافظ عليك بعد كل الحصل دا!! انا ندمت لاني اتزوجت انا انطعنت ف قلبي بس م عارف بسهم منو..انا كلامو دا نازل ع قلبي زي السكاكين ووالله لو كان اتهموني بمقتل جمال خشاقجي كان حيكون ارحم علي من الطعن ف شرفي..قمت ع حيلي وشلت المصحف عايزه احلف ليه بأني برئية بس طلع خلاني!! اسوي شنو انا ولا الجأ لمنو..جاتني عبير قالت لي نحنا اعتبرناك اختنا وبجد حبيناك تقومي تعملي فينا كدا!! قلت ليها حتى انتي ي عبير!؟ بكت وقالت لي بغض النظر عن منو الغلطان بس لو م كان جيتي البيت دا الشيء دا كلو م كان حصل ومشت خلتني وجددت علي البكى..وانا غرقانة ف نهر دموعي اسمع ليك جوطة برا وكواريك انا قلت خلاص الاخوان اتشبكو ف بعض وقمت جارية توبي م لبستو زي الناس..القى ليك عثمان شايل شنطتو وامو واخواتو بجابدن فيه قال ماشي مخلي البيت وحيخلي البلد عديل..عليكم الله شوفو التافه دي خبيث كيف..نظام انا مظلوم وماشي عشان م يكبر الموضوع وانو دا الحل الوحيد للمشكلة دي..عمر حضنو!! اي انا زاتي اتصدمت حضن اخوة وبقو يبكو زي النسوان وعمر العوير يقول ليه انت اخوي الكبير وابوي مستحيل تعمل شيء زي دا...انا خلاص حسيت بنفسي م بسوى شيء وانو كرامتي وشرفي سحبوهن مني بالغدر والخداع..جيت ماشة عليهم علا مسكتني من يدي بس نفضت يدي منها ولفت عمر من عيني جات ف عينو قلت ليه طلقني!! 

 يتبع..

#اخو_راجلي17¥

  

انا زاتي اتهجمت وقلت ليه انا زاتي شامها بس م شفتو دخل!! طوالي مشى الصالون..وإتأخر علي وانا منتظره وقلقت وقلت خلاص عثمان بكون بدبر لي ف مكيدة ولمن بطني ماصتني! جا متأخر بعد انا نمت وم صحاني..صباح قمت زعلانة ولا صبحت علية وجيت طالعة من غرفتنا وخليتو ببرر لي ف الحصل..اتضح انو عثمان جا عايز اخوة ف موضوع ولم لقاه ماف رجع..يعني شنو!! اتاوق ف الغرفه ولقاني م محتشمة وعرف انو اخوة ماف ورجع عليك الله عمر دا م مسكين!! ولا قال ليه شيء ولا مرتي كانت واخدة راحتها ولا كان تخلي الموضوع للصباح وقعد معاه لانصاص الليالي..ود الشي الغضبني اكتر..مشيت الحمام وجيت وعمل حاجات كتيرة ماف داعي لزكرتها..وف الاخر اختكم قلبها حنين ورضيت! عوضنا يوم امس داك وتاني مشيت استحميت..وانا راجعة البيت لاقيت عثمان ف وشيء والغضب ف وشو وقالي انا بقيت م بستحمل اشوفك مع اخوي امس قدرت ابعدو عنك..بس اوعدك من هنا ولقدام العايزاهو م بيحصل..انفعت ف الكلام معاه وقلت ليه عايز تصل لشنو بالضبط اختي وخطبتها وراجلي يومي مسبب لي معاه خلاف الله يأذيك كان عايز تأذيني واختي..وم حتتزوجها إلا ع جستي.. واتلفت كدا كان القي ليك عمر وراي واقف مصدوم..انا زاتي اتخلعت وقال فهموني الحاصل شنو!! عثمان قال ليهو ماف شيءمشكلة بسطية وبتتحل!؟ عمر رمى غيارو كان خاتية ف كتفو وهاج وقالي لشنو م عايزه عثمان لاختك!! وانا خلاص م عرفت اقول شنو ولا ابدا ليه من وين..تاني عاد لي السؤال انا قلت ليه بسبب تصرفات اخوك معاي..الإتنين نططتو عيونهم عمان قالي الله يسامحك وكمان بتهجمي فيني! بس غلطان انا الجيت وينعل ابو اليوم الرجعني السودان وانا بتكلم مع عمر وقلت ليه اخوك دا صيفتو وصيفتو وانفعلت لدرجة اني م متزكرة الكلام القلتو شنو!! وناس البيت كلهم جو ولو م اخاف الكضب الجيران زاتهم بكون راخين اضانهم لانو صوتنا كان عالي شديد..وعثمان يقول اي كلامها صاح وانا غلطان وقولي اي شيء انا راضي بس م تخربو بيتكم بسببي انتو اخواني الصغار وانا كل مرة بنحط ف نظري اكتر وم فضل إلا انط ف رقبتو واكتلو..وعمتي لمن رجفت لم سمعت الكلام دا..واخر كلمة قلتها ي عمر اخوك بخونك وعايز يمس عرضك هنا عثمان عناني ووقف قصاد وشيء وقرب يلطشني كف لحدي م رفع يدو فوق...بعداك مشى سريع كدا زي الهروله جاب تلفونو من الصالون وقال لعمر شوف الرسائل الزبالة دي مش من مرتك شوف المكالمات الفائتة والمرفوضة دي مش من مرتك ياخ كرهتني حياتي وكرهتني البيت وكلو بقول لسه صغيرة وحتعقل ولدرجة انها بتجيني ف الصالون حتى اسأل امي!! ياخ انا عشان اخليها تبعد عني مشيت خطبت اختها عشان تقتنع وتبعد عني بس زي م انت سمعتها قالت مستحيل تسمح لي اتزوجها وكمان تهجمي فيني تقولي انا قليت ادبي معاك حرام عليك والله م كنت قايلك كدا..وانا خلاص جسمي كلو بقي يرجف..وحتى عمر جسمو كلو بيرجف وإتلفت عاين لي وقالي الكلام دا صحي!! 

 يتبع..