انا اتوترت بس حسيت بأنو عمتي متخوفة من قعدت عثمان ف البيت..قال لامو خلي عبير تخت لي فطور جيعان شديد..عمتي ورتو انو عبير مشت تقعد مع عايدة اختهم لانو هي واولادها عيانين!؟ عاين لي وقال بقيتي كيف؛شايفك احسن من اول..قلت ليه كويسة وانا مارقة ع بيتي عمتي قالت لي عليك الله ختي ليه معاك فطور..لو كان عندي صبغة كان سممتو الكريه..فعﻵ ختيت ليه ولم جبتو لقيت عمتي ماف م بعرفها ف الحمام ولا وين..قالي تعالي اكلي معاي!؟ قلت ليه شبعانة وجيت طالعة قالي خلاص خليك قاعدة ساي شان تفتحي نفسي!! إتلفت عاينت ليه وقلت اخخخخ توووف قصادو وقلت ليه اها كدا نفسك فتحت خليت ملامحو م بتتوصف من الغضب ومشيت بيتي..اتصل علي عمر يطمئن علي اتونسنا واخدت لي نومة..وصحيت ع جوطة علا وحسها العالي..من جات ملابسها م غيرتها جاتني ف بيتي..قلت ليها متين جيتي اسه عشان تعملي لي وجع وشش ..ضحكت وقالت دي جزاتي عشان عايزه اشوفك بقيتي كيف..المهم اتونست معاي وقالت لي انا عايزه اسألك..صريت عيوني وقلت ليها خير اسألي!! قالت لي انتي لم سألتك عن عثمان اليوم داك بكيتي وقبل م توريني اخوي جا..اها احكي لي..اترددت بين اوريها ولا لا بس ف النهاية حكيت ليها الحصل!! لم خلصت لقيت دموعها بلو ملابسها..حضنتني وقالت انتي مستحملة دا كلو كيف ولشنو م وريتي زول..وتبكي وتقول عثمان م كدا ولابالغلط م اتصرف تصرف يسئ ليهم فكيف يخون اخوة وينحط للدرجة دي...قالت حتكلم امها وامها توري ابوهم بس انا ابيت قلت ليها الموضوع دا لو انتشر حتقع رقبة وعيعمل فتنة كبيرة بس انا حفضل اصد ف اخوها لحدي م يسافر..قالت انها خايفة على عمر لانو بحب عثمان شديد وم بيرضي فيه ولو عرف احتمال يروح فيها..وعدتني انها م تجيب سيرة لزول وقامت بس قبل م تطلع قالت لي كنا افضل اخوان ولا نقاش بسيط مع حصل بيناتنا وعثمان من اغترب م قصر معانا وخصوصي مع عمر بس من جيتي إنتي.. وسكتت انا بكيت جاتني راجعة وبتعتذر انها م تقصد شيء وتقشقش ف دموعي وهي زاتها بتبكي بس قالت لي سماحك ودمك الخفيف سحرو عثمان وحيفتن بين الاخوان عشان كدا الحمدلله طلعت شينة عشان م اعمل فتنة...ضحكنا ونحنا بنبكي..وطلعت؛ وكمان هي م شينة سمحة وسكرة بس لونها اخدر شديد م زي باقي اخوانها..ولانو عبير مافي مشيت شديت ليهم الغدا وعملت لعمتي الجبنة خليتها بتتونس مع اولادها ومشيت بيتي ع وصلتي عمر جا..سلم علي ومشي قعد معاهم وانا ولعت حفرتي..نص الليل بطني وجعتني وماشة الحمام جيت طالعة سامعة الكدايس بتشاكلو وانا بخاف منهم صحيت عمر عشان يمشي معاي رفع راسو عاين لي قال اسه اشنه انتي ولا الكديسة امشي ساي م بسألنك ورجع رقد..خبتو بتوبي ف راسو وطلعت وانا بباري بطرف الحيطة عشان م اقرب عليهم لحدي م وصلت الحمام..وانا طالعة لقيت عثمان ف وشي بطني تاني وجعتني تخيلو معاي صعوبة الموقف الواطا ليل وانا وعثمان جمب الحمام وبالشورت والفنيلة ولا خشمي م فتحتو باريت منو وجري ع بيتي م وقفني..والله بطني وجعتني تاني من الخلعة مستحيل اطلع تاني وم قدرت انوم..اليوم التاني ابيت اطلع مع عمر الشارع لانو ابى يطلع معاي امس باليل ضحك ومشي ع شغلوو..مشيت نضفت لعمتي وهي عملت الفطور وجاتها جارتها بتتونس معاها عملت ليهم شاي ومشيت بيتي..جاني عثمان لقاني بحضر ف التلفزيون م خش غرفتي فضل ف البرندة وناداني ياخ انا الولد دا طمم بطني..قلت ليه عايز شنو؟! قالي إنتي... اتهجمت واتجهت ع غرفتي قالي دقيقة..م تفهميني غلط بس انا عايز اعرف الم عاجبك فيني شنو!! مهندس ومغترب وسمح وكل البنات منتظرين مني إشارة..كلامو استفزاني شديد وقبلت ليكم علية قلت ليه عايز تعرف الم عاجبني فيك شنو انت م راجل ودنئ وخاين..والم بصون عرضو وبفكر ف مرت اخوة يستاهل ينعدم..تخيلو قالي شنو انا م قلت ليك ازني معاي ولاحشيل منك حاجة بالإكراه بس عايزك تصاحبيني ونكون قراب من بعض..والله م اخذلك ولو خايفة انا ممكن اهربك معاي واسفرك قطر والله اعيشك ملكة وماف زول حيعرف ولا خليهم يعرفو اتطلقي وحلف بحياة بامو وابوه انو يتزوجني..وانا واقفة مصدومة من كلامو بجد عثمان مريض ومهوس شفتو هوس مايا بقي هوس عثمان..وقام ع حيلو وجا علي وعينو بقت زي الجمر وعايزني افكر ف الموضوع انا خلاص بقيت م بشوف وطرررر لطشتو كف ودخلت غرفتني وقفلت الباب واسمع ليك للللب ف الحيطة بس م بعرف ب يدو ولا رجلو..وقلبي بقى زي الدلوكة بنتح..
يتبع
ليست هناك تعليقات:
إرسال تعليق