#اخو_راجلي6¥

 

 يلا ف اللحظة ديك بقيت م بشوف قدامي من شدة الإنفعال..وعمر كان بعاين لاخوة بطريقة غريبة هبشتو من كتفو وقلت ليه للمره الاخيرة بسألك البت منو وعلاقتك بيها شنو!! بعداك شوفو الكبكبة لا والله م كدا افهميني فهمتي غلط إنتي ويقول ل عثمان إنت م تقول حاجة..عثمان مسكني من يدي وقالي اقعدي وقولي بسم الله الموضوع م مستاهل وانا م كنت قايلك حتنفعلي كدا..شلت شنطتي وطلعت بنادو فيني ولا اتلفت عليهم لمت الناس الفي المطعم لاحظو ركبت ف العربية وحصلتني علا وعبير وهم زاتهم مخلوعين وم عرفو يقولو لي شنو بعد اقل من خمس دقائق جو الاخوان ركبو واتحركنا..عثمان بعاين لي بالمريا وقالي معليش انا م كان اقصد ازعلك والله قلتها بهزار ساي نط عمر قال ليها انا بفهمها الحاصل بعد نصل البيت وانا ف اللحظة ديك دمي بيغلي..وكلنا سكتنا زول اتكلم مع التاني ماف لحدي م وصلنا البيت؛ ع دخلتي عمتي م سلمت عليها خشيت بيتي ومنتظرة عمر كان بيتكلم مع اخوة بس قالو شنو انا م عارفة جاني خاشي والخوف ف وشو! وقبل م افتح خشمي قعد جمبي ف السرير وقال لي ح احكي ليك القصة كلها ..قمت ع حيلي وقلت ليه اها قول!؟ قال انو لم كان ف الجامعة عندو زميلتو اسمها ندى كانت بت شاطرة ومميزه وسممحة شديد كل الشباب جارين وراها..لم قال كدا حمرررت ليه هو طوالي سكت! قلت ليه واصل..قال ف السنة الاخيرة ف الجامعة قربو من بعض اكتر وهو من زمان معجب بشخصيتها بس بطبعو م عندو شغلة بالبنات لحدي م اتلاقو ف رحلة طلابية واتونسو وطرح عليها فكرة الإرتباط وهي وافقت بس بعداك شاف تصرفاتها م حلوه وع علاقة بواحد تاني وهو ابتعد عنها ومن الزمن داك م عارف عنها شيء حلف لي وقال دا كل الحصل لكن م عارف عثمان زكر القصة لشنو؟!  يلا انا انفجرت ليك فيهو لشنو م وريتني وانت وعدتني م تكذب علي وانت قبل كدا حلفت لي انك م حصل حبيت بيت غيري يعني طلعت كذاب وببكي هو يتحلف ويقسم انو م كان بحبها بس معجب بيها وانو القصة قديمة وتافة وهو كان ناسيها لانها م مهمة ويقشقش ف دموعي ويتأسف وانا خلاص خشيت ف حالة هستيريا وم قدرت اسكت جيت مارقة من الغرفة مسكني من يدي وانا نتلت يدي منو وطلعت خشيت الحمام تميت بكاي هناك وراسي كان حينفجر من الزعل والوجع..لم جيت طالعة لقيت عمتي منتظراني برا م بعرف رنها بناتها ولا عمر..قالت لي تعالي مشيت معاها وخشيت معاها البرندة مسكتني من يدي وقالت لي والله انتي ف مقام بناتي والشيء البزعلك بزعلني انا كمان..وانا فكيت ف البكاء وهي بتهدي فيني..وقالت لي اسألك سؤال اسه لو كان عمر دا خاطب عديل ولا كان متزوج بت تانية إنتي حتعملي شنو؟! صاح عندك حق تزعلي بس لم هو عرف البت ديك إنتي كنتي ماف ولا كان مفكر يتزوج زاتو..هو عرفها اربعة سنين وم حكي لي عنها ولا قال عايز يتزوجها وإنتي من يومين بس مشي طلب يدك من اهلك عرفتي الفرق بينك وبينها؟!! وعمر م بشكرو ليك عشان هو ولدي بس والله لا بتاع بنات ولا بيعرف بنات مع انو ماشاءالله وجيييه ومحبوب بس مابيشتغل بيهن كتير..خليك بت واعية ونجيضة وامسكي بيتك والراجل لو بتاع نسوان المرة الفالحة بتخليهو م يقدر يعاين لوحدة غيرها..وكلام كتييير بجد م تتخيلو ريحني قدر شنو بس برضو زعلانة من عمر..شكرتها وقلت ليها إن شاءالله بتتسهل ورجعت بيتي..لقيت عمر قاعد ومتهول لم شافني دخلت قام مسكني من كتافيني وصدقيني انا مستحيل اخون ثقتك وانا والله م حبيتها..ومع انك زعلانة مني بس انا زعلان منك اكتر لانك م بتثقي فيني ولا حتى بتثقي ف نفسك والله والله ي هبلة انا بريدك انتي وعيونو دمعت انا واقفة زي الصنم عيوني م رفعتها..خلاني واقفة وطلع من البيت...قفلت علي باب الغرفة وراسي يخبت يمين ويخبت شمال وماف شيء شاغل بالي غير البت السمحة كان عاجبة راجلي.. عمر يجي يلقي الباب مقفول يدق م بفتح ليه يمشي كم مره عملها اخر مره جاتني علا فتحت ليها الباب قالت لي تعالي ختينا العشى قلت ليها شبعانا..كان الوقت زي تمنية ولا تسعة باليل شلت ملاية جدعتها ف سرير البرندة حقتي وقفلت الباب..اظنو لم جا ولقاني مرقت ليه غطى م قرب ع الباب ولا حتى نام ف البرندة مشى نام ف الصالون وانا النوم حلف كان يجيني اتقلب للصباح..لم قمت اصلي الصبح لقيت عمتي صبحت عليها قالت لي اظنك م استوعبتي كلامي الامس انا خجلت منها وقلت ليها حصل خير وكلو حيرجع زي م كان..ابتسمت وقالت طمنتي قلبي ومشت وانا رجعت بيتي كان القي لي عمر قاعد ف حافة السرير وبدق باصبعو ف سنونو لم شافني اداني نظره الليله وووب انا قلت خلاص الليلة بيخنقني بس عملت فيها م شغالة بيه كتير وفرشت مصلايتي عايزه اصلي جراني من المصلاية وجاط فيني انا مقدر موقفك وليك الحق تزعلي بس م كنت قايلك طفلة وبتتصرفي كدا انا خلاص الشواطين كلها حضرت قدامي انا طفلة طيب معرسني لشنو مكان تمشي لصحبتك الفاهمة الواعية وهو جايط وانا جايطة كان القى ليك عثمان ف نصنا مسك اخوة وطلع بيه وانا جسمي كلو بقي يرجف من الغضب..شوية كدا وجاني عثمان خاشي ولا استاذن جا خاشي توووش وانا توب م لابسة..لم شفتو ف ملاية قدامي ختيتها ف راسي ولفحتها ف جسمي جراني من يدي وقعد خمبي ف السرير بقى يعتذر ويلعن ف اليوم الخلاهو يفتح السيرة دي وم كان عارف انو انا حزعل قدر دا..وكلام كتير واترجاني عشان اسامح عمر.  يتبع..