لم شفتو صرخت وهو زاتو اتخلع قال لي قولي بسم الله..وانا بضاري منو عشان م يلاحظ لجسمي ونهرتو عايز شنو؟! لم قام من السرير انا طوالي رجعت حركة خلف ووقفت جمب الباب ومستعدة للجري! لم شافني خايفة اتراجع وقال لي كنت عايز اخد لي نومة والصالون فيه عامر واصحابو بزاكرو وامي معاها مره م ظريفة اقعد معاهم وبرندتك سخنة مروحة م فيها عشان كدا اتجرأءت ودخلت غرفتك وبروضو ريحة سريركم جننتني وطيرت النومة..م تكوني زعلتي انا وشيء لمن رجف من الغضب قلت ليه لو سمحت اطلع عايزه اخد راحتي..وانا قلبي جوة بيرجف...جا علي وقال لي حتهربي مني لمتين ولا انتظر ارد عليه طلع..وانا مصدومة وكالعادة مدا راسو تاني وقال لي اغفلي المكيف عشان م تاخدي برد..بعداك بقيت م بشوف قدامي ورررظ قفلت الباب ف وشو..جبدت المفرش من السرير وجدعتو وطبعآ الغرفة كلها بقت ريحتو لانو عطورو مبالغة م بعرف بجيبها من وين..من شدة م غضبت م لقيت الملطف شان اخفي ريحتو شلت فتيل الخمرة ورشيتو ف البيت كملت الفتيل كلو ف البيت من شدة م وترني..واتخذت قرار انو لازم اكلم عمر بس خايفة ابدا ليه كيف ولا اقول ليه شنو لانو بريد اخوة شديد وبحترمو..وراسي ضرب.. علا جات من المدرسة وقشتني ف بيتي دقت الباب لم فتحت ليها دخلت بتاوق يمين وشمال زي البتفتش ليها ف حاجة..سألتها مالها قالت بتفتش ف عمر!! قلت ليها من متين عمر بيجي اسه؟! ضحكت وقالت ريحة الخمرة طاقة ف البيت كلو والباب مقفول بكون شنو يعني!! ضحكتني وطلعت معاه ع ناس عمتي قاعدين بنتونس جا عثمان طوالي قمت رجعت بيتي..المساء بعد عمر جا بحاول افتح معاه الموضوع بس بجد من شدة م خايفة الكلام بروح مني لاحظ اني متوترة حضني وسألني عن الحاصل معاي ولمحت ليه قلت ليه انت بتثق فيني قدر شنو؟! عاين لي مسافة وقال لي اكتر من نفسي قلت ليه جادة معاك قال وانا كمان..قلت ليه طيب لو قلت ليك حاجة ف اخوك بتصدق كان راقد قام ع حيلو وقالي الحاصل شنو؟! قلت بصراحة ي عمر تصرفات عثمان اخوك م عاجباني..نطط عيونو وقالي حصل منو شنو؟! م عمل شيء بس طريقة كلامو م مريحاني وحاسة بيه جرئ شوية وقبيل لقيتو راقد ف غرفتنا..قالي مستحيل يكون قاصد شيء عثمان اخوي وانا بعرفو اكتر من نفسو بس هو صريح ف التعامل وم بشتغل بالرسميات والفي قلبو ع لسانو..وم تنسي دا اخوي الكبير..وحكى لي موقف طويل بس خلاصتو كان عمر متشاكل مع اولاد ف الثانوي وواحد عايز يطعن عمر وعثمان وقف قدامو الطعنة جات فيه بس كانت سطحية ومطوه صغيرة لكن الموقف م بقدر ينساه وزاد محبتو لاخوة اكتر وقال لي م تتحسسي بس اعملي حسابك وم تسأليه عشان هو م يسألك وخلي تعاملكم محدود لو الحكاية مضايقاك...ياخ عمر دا عوير وبيثق ف اخوة ثقة عمياء وم قدر يستوعبني انا احبطة من كلامو لانو عثمان نذل وخبيث وخسيس ودجال واي شيء كعب يخطر ع بالكم..طفينا النور هو نام بس انا م قدرت وراسي لم وجعني من التفكير..قمت صليت الصبح ودعيت ربي يصرف شرعثمان عني.. وكالعادة راجلي شرب الشاي واتونسنا شوية ومشي الشغل..مشيت ع ناس عمتي نضفت مع عبير وفطرنا عبير طلعت ليها خدرة بتفرم فيها واتصل عمي قال جاي البيت ومعاه ضيف قال يجهزو الغدا بدري عمتي قالت لي عليك الله ي بتي اكلفك امشي رتبي الصالون عمك جاي معاه ضيف..قلت ليها بس عثمان قاعد..نطت عبير قالت ومالو عثمان بياكلك ف سري قلت ليها م عارفة بسوي ف شنو انتي...عمتي ابتسمت وقالت لي امشي ساي عثمان مافي طلع من الصباح..انا لمت شلت نفسي..فعلآ مشيت رتبتو سريع ولقيتو مقشوش بس مسحتو ولقيت عمتي مولعة نار ختيت بخور دنقرت اخت المبخر بس اشوف الكريه جا داخل وقف اتكل ع الباب وقالي من شميت البخور عرفت دي انتي م اشتغلت بيه جيت طالعة قال شفتي النار دي ف قلب بيتكوي زيها..انا بغضب كدا قلت ليه إن شاءالله ينحرق..ومشيت بيتي قلعت توبي ورقدت لانو ليلة امس م نمت وخلاص رخمممت كان اسمع دقة ف الباب النومة طارت وحات ربي وقلت منو!! علا قالت لي البعاتي اتغظت منها بس ياخ دي كديستي الحلوة مشيت فتحت ليها سالتني عن المكوة قلت ليها شالتها جارتنا..شالت توبي وماشة تجيبها لانو جاتني بالجلباب..تاني قفلت الباب وفتشت النوم..م صحيت إلا ع صوت حبيبي وهو بدق لي الباب..ياجماعة انا اتهمصتا وبقيت زي العيانة وبخاف اقعد براي هو يسألني عن الحاصل معاي وانا م عارفة اقول ليه شنو!! مشيت خلطت عصير لحبيبي واديت ناس عمتي وابيت ادي عثمان قالي ف زول قال ليك انا ممنوع من السكر..م رديت بس كبيت كباية ومديتة ليه مسكها مني وإتخيلو عمل شنو لقيتو الواطي متوسد توبي اللبستو علا قبيل لم شافني اتهجمت..!قلب راسو ع التوب وبقى يشم فيه انا جبدتو منو لمن راسو طقة السرير وعلا شافتني..ومشيت بيتي لم وصلت جدعت التوب ف حفرة الدخان وفتشت الكبريت بس والله م لقيتها عشان احرقو خليتو قبلو ودخت ع عمر..قلت ليه لقيت عثمان خاتي راسو ف توبي..قالي بكون قايلو حق امي..وانا نهرتو قلت ليه من متين امك بتكبرت تيابها..ضحك وقال لي بكون مشتاق للحاجات دي وبصبر نفسو بالريحة دي زي م انا م قادر استحمل وبدا يقل لي ادبو وكالعادة الحصل بعداك م بهمكم..اليوم التاني ولم طلعت اقدم عمر ماشي الشغل..لاقبنا اخوة جاي ونفسو خامي لانو بيجري الصباح يومي صبح علينا اخوة ردا وانا م استغلت بيهو عمر مشى وانا جيت راجعة.. قال لي اقيفي دقيقة م وقفت جا وراي سريع وع مسكتو ليدي امو شافتو!!
يتبع..
ليست هناك تعليقات:
إرسال تعليق