باليل م قدرت احكي مع امي ولا هديل لانو البيت مليان ناس..اصبحنا الصباح ولحدي بعد شراب الشاي مشيت لامي ف المطبخ وخلاص بديت المح ليها عن الموضوع بس هي م ادتني فرصة فرحانة شديد انا اعمل لهديل داك واسوي داك والريحة تعملها فلانة ياخ لدرجة الناس الحيمشو مع قدح العرس حدتهم وانا خفت اوريها وامرضها سكت وطلعت منها..مشيت لهديل وتاني حكيت ليها الحاصل بس هي مصرة انها تكمل مع عثمان وإن كان عندو مشكلة معاي..وشوف الكلام معاه نعم حبيبي وانا من يوم شفتك اتمنيتك وقلة ادب منها..وانا مخلوعة بعاين ليها وكأنها م خايفة ع بيتي ينخرب..بجد زعلت منها بس قطعتها ف قلبي..طبعآ عمر م اتصل إلا قريب الظهر حتى انا اتصلت عليه من ردا عرفني زعلانة وبدا يعتذر قال مشغول كان المهم دردشنا شوية كدا وقفلت..مشيت استحميت وصليت جيت لقيت مكالمة صادرة مني لعثمان اتخلعت!! وناديت هديل قلت ليها انتي اتصلتي بتلفوني قالت رصيدو خلص وهي م عندها فرجعت ليه من تلفوني انا بكيت وضربت التلفون بالحيطة وشاكلتها لشنو تتصل وهي عارفة انو عثمان مترصد لي..المسي اتصلت علي علا اتونسنا وسألتني إلا وريت ناس بيتنا قلت ليها م وريت امي بس بكرة حوري ابوي! فعﻵ صباح اليوم التاني مشيت لابوي ف الصالون لقيتو ف المصلاية شربت معاه الشاي هناك واتونست معاه..وخجلت اوريهو بس لمحت ليه وهو فهم اني بمر بمشكلة وقلت ليه انو عثمان م مناسب لهديل وبركة انها كانت خطوبة بس..قال لي ربنا يفك كربتك ويبعد عنك اولاد وبنات الحرام..واداني كم نصيحة كدا وسألني لشنو م مناسب؟! قلت ليه عينو طايرة ابوي عاين لي كدا وقمت مشيت منو..اتصل عثمان وقال جاي عشان يتفاكرو ف موضوع الشيلة ولا شنو م عارفة جا وقعد وامي وهديل يتكبكبو فيه ساي وانا قاعدة وبسمع ف كلامهم وخشمي عندي وهو كل شوية يقول حاجة ويقول لي ولا م كدا..وانا ولا كاني هنا..لم جا طالع قالي عمر قال لو حابة اجيبك معاي قلت ليه لا م ماشة خليهو يجيني بكرة..ابتسم وطلع واكيد تبعتو خطيبتو لحدي الباب..اليوم التاني جا عمر قيل معانا واتونس مع اخواني ورجعنا بيتنا..رجعنا متمسيين ولقينا ناس البيت نامو..إلا عثمان صاحي وف الصالون..انا وراجلي رجعنا مبسوطين ونضحك ساي..عمر قالي انا مشتاق ليك فوق م تتصوري حمشي استحم واجي القاك جاهزة انا ابتسمت وقلت ليه غور سريع منتظراك..بصراحة انا زاتي مشتاقة ليه وف لحظه نسيت عثمان وقصصو وبس عايزه اعيش اللحظة بس ع قول حبوبتي الشقي م بتساعد!! فكيت الشعر ف نص الضهر ولبست اكتر هناي هو بحبو!! واتريحت ومنتظرة..وانا واقفة ف المرايا وبعاين ف نفسي وبظبط ف روجي اشم ريحة عثمان ف الغرفة وكانو بخى الفتيل كلو وجا غرفتي!! إتلفت يمين شمال م شفتو بس والله كان هنا لكن دخل ولا كان واقف جمب الباب م عارفة..وانا اتوترت واتغطيت قلت بكون براقب فيني..جا عمر بشمشم ساي ولا علق ع شكلي ولا لبسي اول شيء سألني منو عثمان جا هنا!!
يتبع..
